मराठीत विनोदी चित्रपटांची परंपरा मोठी आहे. त्या विनोदाच्या परंपरेतीलजलसा या धमाल चित्रपटाची मेजवानी फक्त मराठी चित्रपट वाहिनीवर घेता येईल. येत्या रविवारी १७ सप्टेंबरला सकाळी ११.०० वा. व सायं ७.०० वा. याचित्रपटाचा वर्ल्ड टेलिव्हिजन प्रीमियर फक्त मराठी वाहिनीवर होणार आहे.
अमर आणि प्रेम या दोन तरुणांची कथा या सिनेमात दाखवण्यात आली आहे. मामा ऊर्फ भैय्यासाहेब नागपुरे (भारत गणेशपुरे) यांची जलसा नावाची नाटक कंपनी आहे. प्रेक्षकांसाठी चेष्टेचा विषय ठरलेली नाटके या गावामध्ये ही कंपनी सादर करते. दुसरीकडे नाटक-चित्रपट तयार करण्याच्या नादापोटी डोक्यावर कर्जाचा डोंगर असलेल्या अमर आणि प्रेम (आशुतोष राज आणि निखिल वैरागर) या दोघांना पुण्यातील घरातून त्यांच्या वडिलांनी हाकलून दिले आहे. हे दोघे मामाच्या नाटक कंपनीच्या माध्यमातून ‘एकच प्याला’ हे नाटक बसवण्याचा प्रयत्न सुरू करतात. गावामध्ये मामाला विरोध असलेले दोघे भाऊ (सागर कारंडे आणि अभिजित चव्हाण) हे नाटक होऊ नये यासाठी जोरदार प्रयत्न सुरू करतात. त्यानंतर यादरम्यान झालेल्या विविध उचापती आणि नाटकाचा प्रयोग होईपर्यंतचा सारा प्रवास म्हणजे जलसा हा चित्रपट. या चित्रपटाचे खास आकर्षण म्हणजे मानसी नाईक हिच्यावर चित्रित झालेले व लोकप्रिय ठरलेले ‘बाई वाड्यावर या’ हे गाणं या चित्रपटातील आहे.
जलसा मध्ये भारत गणेशपुरे, सागर कारंडे, अरुण कदम, अभिजीत चव्हाण,आशुतोष राज, निखील वैरागर, शितल अहिरराव, सोनाली विनोद यांसारखे कलाकार आहेत. प्रेक्षक पसंतीचा विचार करत अनेक चांगल्या चित्रपटांची मेजवानी देणाऱ्या फक्त मराठी वाहिनीने जलसा चित्रपटाची दिलेली भेट प्रेक्षकांसाठी ट्रीट असणार आहे.
प्रसारण - रविवारी १७ सप्टेंबरला सकाळी ११.०० वा. व सायं ७.०० वा. फक्त मराठी चित्रपट वाहिनीवर.